Alpiner Kultursommer - Stad Artistic - Greina 2004 - Pressestimmen
zusammengestellt von www.kunstschalter.ch
alle Beiträge unterliegem dem Copyright der jeweiligen Zeitung


31.12.2003: La Quotidiana Objects d'art entuorn il Muot la Greina. (p. 3)

Objects d'art entuorn il Muot la Greina

La secziun Péz Terri dil CAS prepara igl eveniment cultural 2004 ella Greina

dad augustin beeli

Alpinists vulan guder la natira, oravontut ir a cuolm ed ascender pézs. Egl onn 2004 vul la secziun Péz Terri dil Club alpin svizzer cumprovar ch'igl alpinissem s'accorda buca mo cun sport, mobein era cun art e cultura. La primavera e duront la stad 2004 vegn la Greina ad esser liug d'acziun digl art. El meins da schaner cumpara en differentas revistas e gasettas d'art dalla Svizra la publicaziun d'ina concurrenza d'art. La secziun Péz Terri dil Club alpin svizzer (CAS) envida artistas ed artists da s'annunziar pigl eveniment che marchescha la stad 2004 ella Greina. Ins sto buca temer che la Greina setransformi en in circus spectacular cun caneras e disturbis. «Las ovras duein s'accordar culla natira. Silmeins el vast senn duein ellas plinavon haver in connex culla cuntrada dalla Greina», declara Giochen Bearth viers LQ.

L'idea vegn finalmein realisada

L'idea d'organisar ina tala exposiziun deriva da commembers dalla secziun. Gia daditg hagien ins discutau surlunder en suprastonza, di il president. Igl onn proxim vegn l'idea finalmein realisada. Ella revista da novitads dalla secziun, la «Clubnachrichten» dil december, communichescha il president egl editorial ch'ins seigi vidlunder da preparar in eveniment cultural ella Greina.

Els statuts seigi ei francau da dar peisa era alla cultura, e buca mo sulet a sport, ambient ed alpinissem, puntuescha il president dalla secziun cun ses 1200 commembers. La secziun Péz Terri vala sco ina dallas pli dinamicas enteifer il CAS. Las valurs centralas natira e cumpignia ein e restan ils elements impurtonts dall'uniun sursilvana d'alpinists. Igl onn 2004 duei la cultura tonaton retscheiver l'emprema gada ina posiziun speciala.

Forsa era Bernhard Luginbühl?

La camona dil Terri, la regiun dil Carpet la Greina ed il Muot la Greina schain en ina cuntrada denter 2130 e 2400 meters sur mar. Leu han persunas cun nivo artistic caschun da presentar e schar valetar art figurativ, pictura ed auter. Sch'ina installaziun da Bernhard Luginbühl, plasticas da Max Bill ni sculpturas, fuormas e fotografias dad auters artists vegnan a svegliar attenziun e gudignar premis semuossa el decuors dils 2004. Buca mo artists indigens, mobein scadin artist d'in cert nivo naziunal ni internaziunal sa separticipar all'exposiziun cun concurrenza.

Ida Bänziger, presidenta dalla secziun Rätia, Gion Caminada, architect da Vrin, igl avat da Mustér Daniel Schönbächler, Peter Schmid, president dalla fundaziun da cultura Val Lumnezia sco era la psicologa ed artista Rita Lörtscher da Bellikon fuorman la giuria. Quella ed ils turists che visetan la Greina vegnan a valetar las ovras spatitschadas sigl areal alpin.

Mo caussas ch'ins sa responsar

Giochen Bearth renda attent ch'il Plaun la Greina vegn buc ad esser inclus el perimeter dalla zona d'exposiziun. Sco il president dalla secziun manegia, quentan ins cun rodund 30 annunzias per quei eveniment. Per saver organisar quella concurrenza ed exposiziun ora el liber sin territori da Sumvitg ha la secziun stuiu dumandar ina lubientscha. «Nus essan vidlunder da reglar quei», declara il president. El accentuescha aunc ina gada che la camona dil Terri ed il territori da Carpet la Greina vegnien strusch inundai da spitachels, caneras e disturbis. Tgi che separticipeschi sappi ch'el exponi en ina regiun situada duas uras naven dalla davosa via, aschunta el.

Mintga singul participont ei sez responsabels pil transport da ses objects el liug destinau. Mo caussas ch'ins sa responsar anflan la via ella Greina. «Nus quintein cun paucs transports da helicopter pervia da quell'exposiziun», prevesa Giochen Bearth. L'jamna suenter Pastgas vegn il comite d'organisaziun a communicar la gliesta dad artistas ed artists che separticipeschan agl eveniment cultural 2004 ella Greina.



La cuntrada dalla
Greina: Dretg dalla
foto il Muot la
Greina, 2398 m s.
m. La spunda
dretga da quel, il
Carpet la Greina,
vegn ad esser
culissa dall’exposiziun.
(Foto: MAD)
La cuntrada dalla Greina: Dretg dalla foto il Muot la Greina, 2398 m s. m. La spunda dretga da quel, il Carpet la Greina, vegn ad esser culissa dall’exposiziun. (Foto: MAD)


© Südostschweiz, Chur

Artikel als PDF (215 kB, mit Bildern)


Zurück/anavos: Pressespiegel / stampa

Home: kunstschalter.ch (D) ni kioskdacultura.ch (Rom)