Alpiner Kultursommer - Stad Artistic - Greina 2004 - Pressestimmen
zusammengestellt von www.kunstschalter.ch
alle Beiträge unterliegem dem Copyright der jeweiligen Zeitung


25.06.2004: La Quotidiana Cultura ella Greina. (p. 3)

Cultura ella Greina

La vernissascha dalla exposiziun sut tschiel aviert ha liug questa fin d'jamna

(gv) «Stad da cultura ella Greina»: Sut quei motto ha la Secziun Péz Terri dil Club alpin svizzer envidau artists da sefatschentar culla Greina. 112 artistas ed artists e gruppas han inoltrau projects ed ina giuria ha selecziunau 30 per l'exposiziun. La vernissascha ha liug questa fin d'jamna e la pli gronda part dils artists ei presenta. La pli gronda part dils objects ei era exponida. Mo la neiv che schai ella planira ha evitau che l'exposiziun ei aunc buca cumpleta.

Sefatschentar culla Greina

«Ils artists han stuiu sefatschentar culla Greina», ha igl iniziant ed anteriur president dalla secziun Leo Condrau da Ennetbaden detg. Quei hagien els fatg a moda differenta. Ferton ch'entgins enconuschien fetg bein il territori mistic, hagien auters retratg las informaziuns digl internet. In dils artists ch'expona actualmein e ch'enconuscha fetg bein la Greina ei Bryan Cyril Thurston da Leiston ella Engheltiara. Thursten ha gia ediu in cudisch da maletgs dil territori sin 2100 meters sur mar.

Ils ulteriurs artists seigien artists enconuschents che hagien gia exponiu en differents loghens. Quater seigien da lieunga romontscha, ha Condrau confirmau. Ils responsabels seigien stai surstai dalla rihezia d'ideas e dalla qualitad dils projects exponi. Leo Condrau: «La giuria ha selecziuau lavurs che fan senn d'exponer in tal liug. «Il risguard dil territori alpin sensibel seigi stau ina premissa. Intervenziuns ella natira seigien buca vegnidas lubidas ed il transport ha duiu esser conform agl ambient. Ils organisaturs vulan era negina inscenaziun dil Plaun la Greina.

Era en auters loghens pusseivel

L'idea d'organisar ina exposiziun d'art ed architectura ella Greina ha Leo Condrau gia dapi liung temps. Igl eco sin ina exposiziun semeglionta el territori dil Furca ha lu dau il davos stausch. Condrau ei pertscharts dalla impurtonza dalla Greina, mo el di: «Ina tala exposiziun fuss era pusseivla el territori da Maighels, quei denton cun in auter concept.» A Maighels ha la secziun Péz Terri ina ulteriura camona.

L'exposiziun cuoza treis meins. Duront quei temps duei l'exposiziun esser in liug da scuntrada e discussiun. Ils visitaders ein envidai dad eleger igl object preferiu che survegn il premi dil publicum.

Exposiziun, concert ed excursiun

L'entschatta dalla exposiziun vegn dada questa fin d'jamna culla vernissascha e l'exposiziun cuoza tochen l'entschatta october. Il venderdis ils 20 d'uost ha liug ella halla da Vrin in concert cul percussiunist Fritz Hauser ed igl architect indigen Gion A. Caminada referescha davart «Cuntrada e carstgaun». Il di suenter fa Caminada la damaun ina guida architectonica atras Vrin e suenter ha liug ina excursiun da Vrin tochen ella Greina. Prelecziun e musica cun Leo Tuor e Flurin Caviezel. Suenter la premiaziun suonda ina «prelecziun dramatica» cun René Schnoz e Gian Rupf. Ina excursiun culturala naven dalla camona dil Terri suonda la dumengia ils 22 d'uost.



La Greina daventa
questa stad in liug
da scuntrada e
discussiun. Ina
exposiziun d’art
duei intimar.
(Foto: LQ)
La Greina daventa questa stad in liug da scuntrada e discussiun. Ina exposiziun d’art duei intimar. (Foto: LQ)


© Südostschweiz, Chur

Artikel als PDF (190 kB, mit Bildern)


Zurück/anavos: Pressespiegel / stampa

Home: kunstschalter.ch (D) ni kioskdacultura.ch (Rom)