Alpiner Kultursommer - Stad Artistic - Greina 2004 - Pressestimmen
zusammengestellt von www.kunstschalter.ch
alle Beiträge unterliegem dem Copyright der jeweiligen Zeitung


29.06.2004: La Quotidiana Nizeivel, denton buc utilisabel. (p. 3)

Nizeivel, denton buc utilisabel

La stad da cultura 2004 ella Greina ei lantschada

da gieri antoni caviezel

n Viagiond vier il Pass Diesrut per serender alla presentaziun dallas ovras d'art ch'ins sa contemplar duront questa stad ella Greina sun jeu sedumandaus schebein ei fetschi insumma in senn d'exponer cultura en ina cuntrada aschi magnifica. Basegna ei effectivamein aunc ovras artisticas en ina regiun aschi unica, mistica e fascinonta? Sto la culissa dalla Greina era star botta per attrer novs hosps, respectivamein aunc dapli glieud ella Greina ? Dat ei insumma artists ch'ein habels da crear ovras che pon funcziunar en ina tala cuntrada ni vul il Club alpin svizzer semplamein provocar cun sia idea? Vul ins intimar ils visitaders dalla Greina da sefatschentar e seconfruntar cun novs aspects egl alpinissem? Tut damondas senza rispostas.

Il fatg ch'il teater da performance ed il plaid d'avertura eran gia vargai cu jeu sun arrivaus (dil reminent puntuals tenor program) alla camona dil Terri han buca sminuiu mia sceptica viers tals eveniments. Da principi stuess ins saver ch'ins ha da far cun empau caots ed improvisaders cu ei setracta d'art. Enstagl da star e beiber tut pacific caffè cun la fumeglia d'Alp Diesrut, enstagl da star e contemplar l'ovra da Jacinta Candinas «sur dil vegnir e svanir» - in'installaziun pittoresca che segirescha fastitgs e che sesanfla agl ur dil trutg viers la camona - havess jeu saviu esser pli che mo ad uras el liug. Fatg ir surora il fell ha ei oravontut perquei ch'jeu havess viu ed udiu fetg bugen la performance da Luis Coray sut il tetel «festa-coller». El eis sefatschentaus en special cun ils pasturs e marcadonts dalla Greina, denter auter era cun miu tat Sep Antoni da stiarls. Da quei ch'ins ha buca viu san ins era buca reportar, denton filosofar.

Tenor Luis Coray provocheschi la cuntrada dalla Greina semplamein da far art. Sia finamaira culla «festa-coller» seigi stada da reprender fastitgs da pli baul, interpretar quels da niev e dar ina nova muntada. Festa da pasturs e cannas entagliadas seigien adina stadas dapli che mo in toc lenn. L'incumbensa digl artist seigi buca da derasar ideologias, mobein d'accentuar las bellezias dalla cuntrada cun far talas installaziuns. Ins stoppi far adatg da buc interpretar entuorn la cuntrada, daventar mistics ni romantics, mobein stoppi seconcentrar sin haver visiuns senza emblidar la historia. Gest la Greina sforzi igl artist da luvrar a moda fetg sempla.

Suenter haver examinau e contemplau diversas ovras ein mias resalvas davart il senn da realisar in'exposiziun d'art en ina cuntrada sensibla sco la Greina stadas sparidas. La barca en mescal, il mantun crappa en tenda, il crap enzugliaus en launa, la perfomance el rudi d'antennas, la matrix da bandieras ella garvera, la bissacca cotschna en fuorma da plumatsch magic, igl èr da flurs artificialas en in puoz ni il paravent ein mo entginas dallas installaziuns che pon fascinar e far ponderar igl aspectatur.

Che la deformaziun professiunala e che la critica la pli hanada vegn ord las atgnas retschas ei semanifestau era a caschun dall'exposiziun ella Greina. La performance sil Muot la Greina ha in schinumnau expert d'art (silmeins tenor el sez) taxau per penibla, deplazzada e nuot auter ch'ina autoinscenaziun. Sche el ha il schampagner che ha buca fatg bein en quell'altezia, sch'el ei sez forsa buca vegnius risguardaus dalla giuria ni sche quel ha buca vuliu capir l'inscenaziun resta in ulteriur secret dalla Greina.

Che biaras persunas vegnien silpli a rir sur d'ina tala exposiziun seigi el cunscients, gi Gion Antoni Caminada , commember dalla giuria. A quels che sappien far nuot auter che rir davart ina tala exposiziun maunchien las habilitads da viver e sentir igl art. Las ovras hagien astgau esser fetg abstractas, per vegnir selecziunadas hagien quellas denton stuiu haver in stretg connex cun la cuntrada dalla Greina . Ina finamira d'ina tala exposiziun seigi era da sensibilisar la glieud per l'estetica, da mussar ch'ins sappi emprender ord igl art da contemplar e veser certas caussas ord autras opticas e perspectivas. El ei era perschuadius ch'ins sappi transferir la creativitad dils artists sin autras clamadas, ch'egl avegnir stoppi ins restar d'ina vart realists e critics, denton era haver visiuns. Haver las habilitads da nezegiar igl entir potenzial daventi existenzial per dabiars. Art seigi e resti enzatgei nizeivel, denton buc utilisabel.



Il teater da perfomance da Kari Joller ha fascinau ils aspectaturs. FOTO G. A. CAVIEZEL
Il teater da perfomance da Kari Joller ha fascinau ils aspectaturs. FOTO G. A. CAVIEZEL


© Südostschweiz, Chur

Artikel als PDF (213 kB, mit Bildern)


Zurück/anavos: Pressespiegel / stampa

Home: kunstschalter.ch (D) ni kioskdacultura.ch (Rom)