Alpiner Kultursommer - Stad Artistic - Greina 2004 - Pressestimmen
zusammengestellt von www.kunstschalter.ch
alle Beiträge unterliegem dem Copyright der jeweiligen Zeitung


16.07.2004: La Quotidiana Regurdientschas dil fest coller. (p. 5)

Regurdientschas dil fest coller

(gv) El rom dalla «Stad culturala Greina 2004» muossa igl artist Luis Coray da Laax questa fin d'jamna silla Greina il teater da performance. Tenor la descripziun digl artist setracta ei d'in teater da performance da pasturs. En quei teater gioga il fest coller la rolla principala. Per Coray ei Greina buca mo in num: «Da mia tatta da Rumein - ella derivava da Vrin - haiel jeu udiu bia historias e legendas dalla Greina». Ulteriuras historias dalla Greina ha Coray legiu el cudisch «Regurdientschas d'in buob da Puzatsch», screts dil frar da sia tatta Valentin Anton Pelican. Era il fest coller enconuscha Luis Coray bein. Da buob ha el empriu d'enconuscher quel cun pertgirar vaccas. Il «fest da pertgirar» seigi stau igl uaffen principal duront il pertgirar la vacca da casa. Luis Coray: «Cul cunti da sac vegneva il fest coller pinaus e duront il pertgirar las vaccas vegneva el entagliaus cun ornaments.» Il fest vegneva buca mo duvraus per pertgirar, el vegneva era duvraus per far termagls e giugs. Las regurdientschas che Luis Coray ha dil fest coller e las regurdientschas dil buob da Puzatsch ein il tema dil teater da performance. Il venderdis entuorn las 16.00 e la sonda denter las 9.00 e las 10.00, presenta igl artist ella vischinonza dalla camona dil Terri il teater. Denter auter reparta el festa coller e cuntials allas aspectaturas ed aspectaturs per schar entagliar quels il fest tenor gust. Ils fests vegnan catschai ella tiara e fuorman ina part dalla exposiziun «Greina 2004». Prelecziun, tun e giug cul fest ein ulteriuras parts dil teater da Luis Coray.


© Südostschweiz, Chur

Artikel als PDF (226 kB)


Zurück/anavos: Pressespiegel / stampa

Home: kunstschalter.ch (D) ni kioskdacultura.ch (Rom)