Alpiner Kultursommer - Stad Artistic - Greina 2004 - Pressestimmen
zusammengestellt von www.kunstschalter.ch
alle Beiträge unterliegem dem Copyright der jeweiligen Zeitung


18.08.2004: La Quotidiana Periferia dat impuls als centers. (p. 5)



Periferia dat impuls als centers


Igl avegnir dallas regiuns periferas stat el center dils «Discuors lumnezians » che han liug vendergis proxim ella Halla da Vrin. (FOTO © M. CABALZAR)

In arranschament dalla Fundaziun da cultura Val Lumnezia a Vrin

n (mc) La Fundaziun da cultura Val Lumnezia introducescha vendergis proxim a Vrin in niev ciclus da «Discuors lumnezians» che tematiseschan en dialog denter indigens ed jasters aspects economics, culturals, socials e politics d'ina regiun perifera. El center dall'emprema scuntrada da quei gener stat la corelaziun denter center e periferia. La serada culturala che vegn organisada el rom dalla «Stad culturala Greina 2004» ha liug ella Halla da Vrin e vegn introducida cun in cuort concert dil percussiunist da renum mundial Fritz Hauser. Il medem musicist ha era realisau la concepziun da tun per ils bogns termals da Val S. Pieder. Schizun la New York Times ei plein laud pil musicists svizzer: «Fritz Hauser ei semplamein in dils megliers percussiunist d'ozilgi». Ch'il renomau musicist internaziunal sepresenta vendergis sera a Vrin ei bein ina raritad che mereta menziun e che savess attrer in publicum interessau. Dil reminent vegli la Fundaziun da cultura Val Lumnezia metter mintga onn in accent special en sia activitad, accentuescha il parsura Peter Schmid. Igl onn vargau seigi quei stau il patrunadi dalla Passiun 2003 ed uonn la cooperaziun el rom dallas occurrenzas «Stad culturala Greina 2004» organisadas dalla secziun SAC Péz Terri.

Carstgaun e cuntrada

Davart quella tematica vegn igl architect indigen e professer assistent alla Scola politecnica federala a Turitg Gion A. Caminada a referir. Sco quei ch'il referent ha tradiu a La Quotidiana vegn el a sviluppar en siu referat scenaris pusseivels per che regiuns periferas sappien surviver era egl avegnir. Sias expectoraziuns sebasien sin retschercas che ils students dalla ETH han fatg en pliras regiuns, aschi en Bregaglia (GR), Braunwald (GL) e Marienberg (Vintschgau). Gest el mument che la Svizra seigi lundervi da definir da niev sia politica regiunala seigi ei impurtont che la populaziun dallas regiuns pertuccadas, sefatschentien intensivamein cun lur avegnir sch'ellas veglien buca riscar da vegnir sut las rodas, puntuescha Gion A. Caminada. Ferton ch'ils centers urbans e las agglomeraziuns creschien adina pli fetg ensemen s'isoleschien las regiuns periferas adina dapli. Cuntrari alla teoria ch'ils centers stoppien fructificar la periferia ughegia Gion A. Caminada la tesa che la periferia sappi enrihir e fructificar ils centers. Per saver subsister stoppien las regiuns periferas denton sereferir als agens potenzials e nezegiar optimalmein lur resursas. Sia intenziun seigi buca da furnir recepts fini, mobein da sviluppar ensemen culs pertuccai ideas e projects concrets.

Per quei intent ha lu era liug suenter il referat ina discussiun cul publicum. Quella vegn menada dil parsura dalla Fundaziun da cultura Peter Schmid (Val S. Pieder). Lur preschientscha a Vrin han era ils parlamentaris federals Theo Maissen ed Andrea Hämmerle sco il professer d'agronomia alla ETH Peter Rieder sco era differents exponents dalla politica e dalla economia dalla Val Lumnezia annunziau.
Als presents vegn offeriu in reh buffet cun tratgas indigenas cun differentas sorts carn, caschiel, paun e petta cun péra.

La Sera culturala davart il tema «Carstgaun e cuntrada» ha liug vendergis proxim allas 20.00 ella Halla da Vrin.


© Südostschweiz, Chur

Artikel als PDF (402 kB, mit Bildern + Werbung)


Zurück/anavos: Pressespiegel / stampa

Home: kunstschalter.ch (D) ni kioskdacultura.ch (Rom)