Alpiner Kultursommer - Stad Artistic - Greina 2004 - Pressestimmen
zusammengestellt von www.kunstschalter.ch
alle Beiträge unterliegem dem Copyright der jeweiligen Zeitung


23.08.2004: La Quotidiana Tgei impuls sa la periferia dar als centers? (p. 5)



Cuntrada e carstgaun alla periferia (Front)

n (mc) El rom dils «Discuors lumnezians» instradai dalla Fundaziun da cultura Val Lumnezia han indigens ed jasters discutau a Vrin davart igl avegnir dallas regiuns periferas. En siu referat ha igl architect indigen Gion A. Caminada che docescha alla Scola politecnica a Turitg skizzau il svilup dalla natira genuina ch'ei semidada entras intervenziun humana ad ina cuntrada culturala. En nov tesas ha el sviluppau ideas co las regiuns periferas sappien dar impuls e fructificar ils centers. La discussiun suandonta cun exponents d'architectura, agronomia, economia e politica ei stada stagn teoretica e senza recepts concrets.




Tgei impuls sa la periferia dar als centers? (p. 5, Gasetta R./La Casa P.)


A Vrin ha igl architect indigen e professer assistent alla Scola politecnica a Turitg referiu davart il tema «Cuntrada e carstgaun». (FOTO © M. CABALZAR)

La Fundaziun da cultura Val Lumnezia ha iniziau il niev ciclus dils «Discuors lumnezians» a Vrin

n (mc) El rom dil project «Stad culturala Greina 2004» lantschaus dalla secziun Péz Terri dil Club alpin svizzer ha la Fundaziun da cultura Val Lumnezia arranschau vendergis vargau a Vrin ina serada culturala sut il tetel «Cuntrada e carstgaun». Igl arranschament ha cumpigliau in concert, in referat, ina discussiun ed in buffet cun products indigens. Il parsura dalla Fundaziun da cultura Val Lumnezia Peter Schmid (Val S. Pieder) ha menziunau che la Fundaziun da cultura vegli metter suenter il grond success dalla Passiun 2003 uonn in accent sin architectura e cuntrada ed introduceschi per quei intent il niev ciclus da «Discuors lumnezians» cun in dialog denter idigens ed jasters davart igl avegnir da carstgauns e cuntrada alla periferia. Per in'introducziun fulminonta dalla serada culturala ella Halla da Vrin ha il percussiunist svizzer da renum mundial Fritz Hauser procurau. Cun virtuositad ha el demonstrau ils numerus registers e las finas nuanzas tonalas da sia battaria ed aschia delectau ils presents cun ina delicatessa musicala ch'ins auda buca mintga di en Val Lumnezia.

Co duein las cuntradas periferas veser ora egl avegnir?

A quella tematica ha igl architect indigen e professer assistent alla Scola politecnica a Turitg Gion A. Caminada dedicau siu referat. El ha formulau nov tesas per in svilup autocton ed intenziunau dallas regiuns periferas. Igl architect da Vrin accentuescha che viver alla periferia astgi buca muntar renunzia alla qualitad da viver ed al comfort ed ei digl avis che las qualitads e las fermezias dalla periferia stoppien vegnir nezegiadas dapli e sappien aschia schizun dar impurtonts impuls pils centers. Bien e ditg hagien ils cuolms giu in aspect smanatschond e la lavur els cuolms era cumbinada cun bia stentas e fadigias. Pér el 19avel tschentaner hagi ei dau ina midada radicala cu poets ed artists hagien scuvretg l'estetica dalla natira e considerau las Alps sco tempels dalla natira. La mecanisaziun dall'agricultura hagi pli tard puspei effectuau ch'il pur seigi s'allontanaus dalla natira ed il ligiom emoziunal cugl «agen tschespet» seigi sesluccaus. Las tendenzas cuntrastontas seigien estetisaziun e suppremaziun tecnica dalla cuntrada. Oz decidi cunzun la politica da subvenziun co la cuntrada hagi da veser ora. Cun sustegn statal seigi ei reussiu da frenar silmeins parzialmein la depopulaziun, da migliurar ils access ed aschia da procurar per prosperitad e beinstonza. El medem mument hagi il pur denton era piars la libertad da disponer libramein da siu funs, constatescha Gion A. Caminada. En vesta alla nova politica regiunala sa Caminada s'imaginar che certas regiuns cun schliatas structuras hagien buca pli la forza da sviluppar projects innovativs e seigien pereclitadas existenzialmein.

Nezegiar las schanzas digl avegnir

En nov tesas postulescha Gion A. Caminada mesiras per segirar igl avegnir dalla periferia. El ei perschuadius che las regiuns periferas sappien dar impurtonts impuls pils centers, sche quellas mantegnien lur autonomia. Autonomia munti denton buca isolaziun, puntuescha Caminada. El pledescha denton per clars cunfins denter periferia e center, facilitond aschia da mantener l'identitad dallas regiuns periferas. La planisaziun dalla periferia entscheivi denton els centers, cun mesiras da planisaziun da territori vegli ins impedir ch'ils cunfins denter ils centers e periferia svaneschien. «Dapli mobilitad porti buca exnum dapli beinstonza», di Caminada fagend allusiun allas stentas da migliurar las colligiaziuns da traffic. Las metodas da cultivaziun stoppien tener quen dalla attractivitad dalla cuntrada. La cuntrada culturala seigi in dils pli gronds capitals economics dallas Alps, sutlingiescha il referent. Il maletg da quella cuntrada culturala seigi primarmein il resultat dalla economia agrara. Gion A. Caminada puntuescha che il puresser da muntogna vegni era egl avegnir ad esser depedents da contribuziuns statalas per saver subsister. Denton era il pur stoppi esser promts da s'adattar als basegns dalla ulteriura populaziun e dils consuments. «Buca mo il hosp ei retg, mobein era igl indigen». Cun quella tesa accentuescha Caminada la necessitad da sviluppar atgnas ideas e da buca capiar auters ed importar ideas normadas. Aschia sedat Gion A. Caminada buca exnum d'enconuscher sco adherent dalla idea da resalisar parcs naturals ella perieria. Talas ideas seigien naschidas els tgaus dils citadins dil marcau e resplendien buca alla intenziun dils habitonts dallas regiuns pertuccadas. Las constantas dil liug - sco clima, topografia, resursas ni tradiziun - stoppien formar la basa per ina nova achitectura, di Caminada. Sch'ins vegli contonscher in nez economic optimal stoppi ins procurar per bia lavur e per bass cuosts da material. La cuntrada seigi buca naturala, mobein in construct dil carstgaun. Il nez tecnic astgi denton buca cuntefar alla estetica. E Caminada concluda siu referat culla constataziun: «Per garantir in bien avegnir agl ur vegn ei ad esser impurtont da nezegiar tut las forzas che stattan a disposiziun».

Paucs recepts concrets

Ils indigens che han vuliu intervegnir dils experts presents recepts concrets per la survivenza dallas regiuns periferas vegnan ad esser stai trumpai. La discussiun sut l'egida da Peter Schmid ei sesplegada plitost sin in plaun filosofic. Ella ei tonanton stada in interessant scomi da meinis denter jasters ed indigens. Dalla discussiun han priu part professer Peter Rieder, cusseglier dils stans Theo Maissen, igl avat Daniel Schönbächler, igl architect Marcel Meier, il schef digl Uffeci cantunal d'agricultura Aurelio Casanova, il historiograf da cultura Marc Antoni Nay ed il pur da bio indigen Pius Caminada.


© Südostschweiz, Chur

Artikel als PDF (157 kB, mit Bildern)


Zurück/anavos: Pressespiegel / stampa

Home: kunstschalter.ch (D) ni kioskdacultura.ch (Rom)