Alpiner Kultursommer - Stad Artistic - Greina 2004 - Pressestimmen
zusammengestellt von www.kunstschalter.ch
alle Beiträge unterliegem dem Copyright der jeweiligen Zeitung


24.08.2004: La Quotidiana Denter tschiel e tiara. (p. 1+7)



Art e cultura ella Greina (Front)

Il Club alpin svizzer ha dau la pusseivladad da presentar lur lavurs el rom da «stad da cultura 2004». Sonda vargada ha la giuria surdau ils premis. Ursula Bachmann da Horgen ha gudignau il premi principal ed il premi dal publicum ha Kari Joller da Dietikon survegniu. Il premi special ei ius a Luis Coray da Laax per sia presentaziun cul tetel «festa-coller». La victura dalla concurrenza: «Sefatschentar culla regiun alpina dalla Greina ed integrar igl art dil moviment en quella cuntrada intacta e plein facettas, ei stada ina gronda sfida per mei. Jeu carezel denton quella cuntrada e perquei sundel jeu sedecidida da separticipar alla concurrenza».

Denter tschiel e tiara (p. 7)


Flurin Caviezel e Leo Tuor han schau reviver las aventuras da Gaicumbert Nau. (FOTO © G. DEGONDA E MAD)

Denter tschiel e tiara

La «stad da cultura 2004» ella Greina ei stada in success


da gaby degonda

n Ella cuntrada mistica dalla Greina ha giu liug duront ils dus meins vargai l'exposiziun «stad da cultura 2004». Il Club alpin svizzer ha eligiu 26 artistas ed artists svizzers che han exponiu lur objects, installaziuns e presentaziuns el territori Carpet la Greina. Il pensum dallas artistas e dils artists ei stau d'integrar art ella natira dalla Greina. Sonda vargada ein rodund 120 persunas serendidas da tutt'aura silla Greina. Quei di ha giu liug la premiaziun dils objects d'art.

La «diala dalla Greina» ha incantau

La bellezia alpina dalla Greina hagi aviert novs horizonts als 26 artists en concurrenza. Da quei ein ils commembers dalla giuria cunscients: «L'integraziun ella natira intacta dalla Greina ei stada impurtonta tier la valetaziun dallas lavurs d'art», ha Ida Bänziger detg. Cun Rita Lötscher da Bellikon, avat Daniel Schönbächler da Mustér, igl architect Gion Antoni Caminada da Vrin, Hansruedi Fricker da Trogen e Peter Schmid da Val ha ella giu l'incumpensa da giudicar e valetar ils objects artistics.

Malgrad l'aria freida e humida ed il ferm vent, ha la premiaziun giu liug avon la camona dil Terri. Igl emprem premi ha la giuria surdau ad Ursula Bachmann da Horgen. L'artista ha presentau ina performance. Vestgida en alv e tgietschen ni mo en alv, semova ella cun grazia misteriusa. Ella semova plaun tras greppaglia, sper l'aua e silla spunda carpusa. Ses moviments harmonics el silenzi dalla natira han perschuadiu ed incantau ils viandonts, mo surtut la giuria.
Il secund premi ha Chritof Lang e Stephan Meylan da Turitg survegniu per l'installaziun «Greina Grabung» ed il tierz Robert Steiner da Biel cul saccados gigant da crap.

«Giacumbert Nau» e siu autur nurser

L'aura bletscha ha carmalau ils viandonts el cauld refugi dalla camona dil Terri. Leo Condrau, il president dil comite d'organisaziun da «stad da cultura 2004» e Gion Bearth, il president dalla Secziun Péz Terri dil Club alpin svizzer, han beneventau ils presents tiel program accumpignont.

Las historias da «Giacumbert Nau» da Leo Tuor han buc astgau muncar tier in tal eveniment. Giuven e vegl ha tedlau cun attenziun las historias dil pastur dalla Greina. Flurin Caviezel ha enramau las historias dil nurser cun sia harmonica. El ha capiu d'enzugliar ils presents cun tuns dil vent e dalla cuffla, dil sburflar dall'aua dallas cascadas e dalla harmonia alpina.
Avon ch'il persunal dalla camona dil Terri puprogni ils hosps cun ina tscheina generusa, han ils dus acturs Rene Schnoz da Mustér e Gian Rupf da Landquart inscenau il drama digl anteriur alpinist Ludwig Hohl «Bergfahrt». Suenter tscheina han tuts gudiu l'atmosfera famigliara ella camona. L'autra damaun tarlischava il sulegl e la Greina sepresentava en vestgiu da dumengia.

La davosa «festa-coller»

Sper ils treis premis principals ha la giuria surdau in premi dil publicum sco era in premi special. Il premi dil publicum ei ius a Kari Joller da Dierikon e siu rudi d'antennas. Il premi special dalla «stad da cultura 2004» ha il pedagog indigen Luis Coray da Laax retschiert. Ella magnifica culissa sut tschiel blau ed avon ch'ils viandonts serendien a val, ha Luis Coray presentau sia performance «festa-coller». Cugl echo da sia tiba, cun bransinas, festa da pasturs, cun fretgs turri e numerus requisits dalla veta muntagnarda, ha el schau reviver veglias historias da marcadonts da biestga e reminiscenzas da si'affonza sco pastur.


© Südostschweiz, Chur

Artikel als PDF (front/p. 1, 194 kB, mit Bildern)
Artikel als PDF (p. 7, 264 kB, mit Bildern)


Zurück/anavos: Pressespiegel / stampa

Home: kunstschalter.ch (D) ni kioskdacultura.ch (Rom)